高雄用紅外線攝影機 成功掠著人偷燒糞埽
陳嘉筠 賴威佐 / 高雄報導
發布時間：
更新時間：
這幾冬來，高雄出現袂少非法業者，走去深山林內偷倒廢棄物，甚至放火燒，真僫掠著人。環保局最近出動熱顯像的搖控無人機，對空中掌握業者偷倒的時間，落尾也順利掠著人。
搖控無人機翕著這片竹林雄雄衝出白煙，因為攏予竹林閘著看無，這斗出動熱顯像鏡頭巡查，就看著一个紅點，確定有人佇竹林內底，偷燒糞埽。
環保人員：「規个塗跤有燒過的痕跡。」
環保人員到現場，發現非法業者當咧燒建築廢棄物，這是今年六月，環保局佇鳥松查緝案件，業者無執照，𪜶攏趁半暝，共廢棄物載去鳥松山林內底烏白擲，而且閣放火燒，附近社區學校攏鼻著臭味，毋過因為覕佇山林，無人機嘛翕無，出動熱顯像，才知影𪜶咧變啥魍，最後業者予人罰十萬。
高雄市環境保護局科長，蘇皇信表示：「掌握可疑的熱點了後，閣佇附近道路佮疑似擲捒的所在，設置縮時攝影，等掌握確實非法擲捒的地點，通知地檢署。」
非法業者佇深山林內偷倒廢棄物，手法愈來愈濟，佳哉環保局有科技幫忙，雙方鬥仙法，猶是掠著違法。
