嘉義六腳溪厝特有門聯 讀音全靠代代相傳

嘉義六腳的溪厝村有一間廟,廟前對聯一爿是有10个日、一爿是有10个月。村長講,這副對聯當地攏咧流傳,毋過愛用臺語來讀,才會當瞭解伊的意思。

嘉義縣六腳溪厝這間竹林順安堂,有一副用十个日字佮十个月字寫出來的門聯,村長講這是當初起廟的時,神明的指示,用台語唸才會正確。

六腳鄉溪厝村村長侯義雄表示:「日月精英光天下,月平燦爛耀乾坤,阮攏用台語來做發音來唸才會順」

村長這幅聯佇地方有五六十冬的歷史,對以前到這馬攏是靠老一輩傳落來,嘛有揣過專家問遮的字,毋過有的字佇字典內底嘛揣無。

地方文史工作者陳俊哲指出:「伊的字、伊的音,康熙字典有的有、有的無。猶毋過阮一般認為,伊總共有十个日、十个月,伊講的意思應該是講,予這个天下、這个乾坤,攏會當大放光明」

文史工作者表示,這種鬥出來的字,一般攏有加強的意思,雖然字典揣無,但是這嘛反映出佇台灣早期社會,使用台語文音佮文字的創意。

相關新聞

專題|全台敬老金大調查