前陣大雨產量減.中秋閣搪風颱來 蚶仔大起價

菜園仔內底，六七个工人對透早五點開始，就無閒咧割菜，趁好天趕緊共遮爾媠的蕹菜採收，抑無連鞭風颱閣欲來矣。

菜園工人：「先加減採收。（今仔日準備收偌濟）就割偌濟算偌濟。」

毋但蕹菜，in拄才才割一車的小白菜送去農會，梓官農會原底拜五菜蔬無進貨，嘛是聽著閣有風颱的消息，農民割偌濟農會就收偌濟，按算拜五菜蔬進貨量有兩噸。

梓官農會供銷部主任劉振華：「這兩日的菜因為猶未足濟。聽著風颱欲到，所以農民有一種預期心理，包括生理人加減囤貨，所以價數加減夯兩三成攏有」

其實頂斗風颱大雨了後，菜蔬專區復耕的菜才差不多會當採收，菜價嘛當咧回穩，想袂到這馬閣起兩三成。另外起價的閣有海產，七股遮堆甲若像山的蚶仔殼，攏是因為頂個月大水雨受害。

七股蚶仔產銷班第十一班長楊惠欽：「整個七股區死亡百分之三四十左右，目前產地起百分之二十。」

蚵仔農王文才：「這大部份攏開矣。這攏死矣。」

七股的蚵仔佮蚶仔攏是因為落雨，塭仔海水的鹽度無夠，造成死亡，產地蚵仔這馬一斤起到140箍，後禮拜中秋恐驚閣會閣起。