疫情期間收入大減 庇護工場捒中秋禮盒硬楗

受疫情影響,真濟弱勢團體毋但捐款減少,連庇護工場烘麭做餅的收入嘛大減。閣過十外工就是中秋節,嘉義縣一寡庇護工場的禮盒,銷路比舊年較䆀,實在是誠煩惱。

庇護工場的學員,逐个攏真專心咧無閒手頭的工課,有人拗紙篋仔,嘛有人咧做餅,嘉義縣民雄鄉若竹兒基金會,身心障礙的學員學功夫增加收入,嘛增加對𪜶家己的認同。

若竹兒基金會教保組長,許麗梅表示:「𪜶會當得著成就感講,原來𪜶佮一般的人仝款,攏會當做到這種程度。」

中秋節就欲到矣,嘉義縣的庇護工場攏希望透過製作禮盒來增加收入,若竹兒基金會講,感謝一寡大企業的支持,最近閣增加袂少訂單,毋過嘛有較小間的庇護工場講,到今的訂單猶是比舊年減三分之一。

若竹兒基金會董事長,林朋輝表示:「舊年可能講有五十間中小企業共阮注文,今年可能干焦賰一二十間,這之間差誠濟。」

領航庇護工場庇護就服員,林育如表示:「可能是因為疫情的關係,已經無工課、無頭路。𪜶可能嘛會感覺講,餅這種物件有抑無攏無要緊,𪜶就袂閣想欲去買這餅來送人的想法。」

嘉義縣的庇護工場,因為這兩冬疫情的關係,經營是愈來愈困難,嘉義縣勞工青年發展處呼籲各界會當支持庇護工場,予社會弱勢的人,會當繼續來有較好的發展。

全台敬老金大調查

相關新聞