今年是屏東沿海三个鄉鎮，東港、琉球佮南州，三年一科的迎王。有真濟民眾轉故鄉參加，琉球鄉遵照古禮，舉辦王船進水、掖糖仔，民眾人𤲍人咧搶糖仔，敢會違反室外三百人的防疫規定？屏東縣政府表示，廟方事先有申請，嘛有遵守防疫規定。
鬧熱的炮仔聲，廟方人員共一大包的糖仔餅，攏總掖落去，廟埕人𤲍人，民眾捾袋仔佮紙箱，搶遮的糖仔餅，現場欲送出三千斤的糖仔餅予鄉親，這是琉球鄉王船祭典的傳統。
三隆宮祭典委員會總幹事，蔡文財表示：「掖落去親像掖真濟魚餌，人講抾糖仔就親像魚仔真豐富，真濟咧跳。本來掖糖仔攏有五六千斤，今仔日縮小無超過三千斤。」
小琉球迎王有百年歷史，今年拄著疫情延到12月，廟方抑是循古禮先舉辦王船進水典禮，由貴賓替王船點眼、戽水、起帆，因為是地方的大代誌，真濟鄉親攏來參加。
屏東縣民政處副處長，楊新發表示：「三隆宮前幾工有提報防疫計畫到主管機關，全員掛喙罨、噴酒精、保持社交距離，人數嘛控制佇三百人以下，一切攏符合規定。」
三年一科的迎王，雖然規模縮小，信徒搶糖仔保平安，嘛愛做好防疫。
