"原教界"雙月刊滿100期 今辦特展說奮鬥歷史

關注原住民教育議題的雜誌《原教界》這本雙月刊,對2005年出版第一期,到今已經是第100期。政治大學這陣當咧舉辦原教界的展覽,欲予民眾了解原教界這17年來,對原住民議題的經營佮奮鬥。

紅布揭開,展現出影目的數字,慶祝原教界雜誌出版第100期。原教界是一本關注原住民族教育議題的雜誌,內容嘛延伸到語言、文化政策等等方面,對濟濟角度來討論原住民族的教育。親像每一期的封底,攏有世界各種語言的專欄,佇第100期,嘛回顧過去紹介的100種語言,其中就包括台灣的46種語言。

《原教界》總編輯林修澈表示:「這本刊物行的路線是專輯路線,就是叢書路線。就是講每一集的雜誌,就親像一本冊,內面寫啥物內容,就是根據過去一冬佮未來一冬以內,原住民教育界內面有可能拄著的議題」

原教界過去的出版,攏佇展覽當中排出來,嘛會使掃QRcode,用手機仔來看。雖然佇這馬網路時代,比起文字的平面雜誌,較濟人愛看影音媒體來吸收智識,但是學者講,原教界猶是真重要的平面媒體刊物。

文化大學大眾傳播學系副教授林福岳指出:「平面媒體雖然看起來有較落崎,毋過譬如講阮欲了解一寡較深入的資訊,尤其是這類教育相關的資訊,文字類媒體所呈現的,猶是有伊一定的深度佮廣泛性」

政治大學9月初8到10月30,佇學校內底的達賢圖書館,辦理特別展覽,希望想欲了解原住民相關議題的民眾,做伙來見證原教界自2005年起算17冬以來,超過1300位作者的參與成果。

全台敬老金大調查

相關新聞