東奧表現出擢創國內紀錄 體操協會表揚選手

2020東京奧運和這馬閣咧比的帕運,咱台灣的選手攏有出擢的表現,今仔日體操協會佇體育署辦表揚會,特別鼓勵所有出戰的選手,包括鞍馬王子李智凱和唐嘉鴻等等,也對選手佇2024巴黎奧運拚好成績,有信心。

體操選手李智凱接下獎座,歡喜的面神藏袂牢。李智凱講對東京奧運轉來了後,這段日子過了真精彩,對這禮拜開始,已經恢復正常的訓練生活矣。

體操選手李智凱講:「這禮拜才回歸正常訓練,距離比賽(全運會)嘛賰四禮拜左右,對阮來講是真大的挑戰,教練訂的目標是安全為主,莫受傷。」

2020東京奧運了後,體操規則就會做修改,李智凱的教練講,新規則初步看起來,對李智凱是無真大的影響。

體操教練林育信表示:「佇湯瑪士的部份,是無打擊著咱李智凱,有一寡難度攏予降落來,但是伊湯瑪士的難度猶是維持,有的閣提懸,所以阮會對提懸的難度去補強,我相信伊2024會閣較成熟。」

體育署佇表揚現場表示,建議中華體操協會等等組織 ,研議佇2024年、巴黎奧運進前,佇台灣舉辦國際賽事的可能。

教育部體育署副署長洪志昌講:「一方面予咱的選手測試,2024彼年咱的實力到啥物程度,除了國內裁判的提升,嘛會使做一寡裁判的交流。」

體育署表示,台灣體操成績已經佇國際上得著肯定,佇巴黎奧運進前,若辦國際比賽,相信對選手備戰2024巴黎奧運,有真大的幫贊。

 

相關新聞

專題|全台敬老金大調查