共和新村受列歷史建築 範圍掠傷闊.被判無效

屏東東港的共和新村,2018年登錄成做歷史建築,毋過國防部空軍司令部認為箍入去的範圍傷闊,提出行政訴訟。高雄高等行政法院最近判決屏東縣政府敗訴,縣府雖然目前無欲上訴,毋過文資所隨啟動暫定古蹟的程序,會重新提出文資審議。

東港的共和新村,內底大部份舊厝已經拆了了,成做一塊一塊的草埔,目前遮干焦賰41間日本時代舊厝,因為2018年予縣府登錄是歷史建築,軍方不服提出行政訴訟,高雄高等行政法院最近判定,審議過程有問題,另外公告保留範圍嘛傷闊,判縣府敗訴。

屏東縣文化資產保護所長林洋助表示:「我們就補正程序,暫定古蹟共伊再登錄。我們雖然無認同,本來欲上訴,後來想講上訴意義無大,因為阮就趕緊啟動進入就好」

文資所表示,in會重新閣提出審議,毋過對已經抗爭真濟冬的眷村住戶來講,in欲爭取生存權,雖然目前干焦二十戶有人蹛,有人的厝可能會去予拆掉。

共和新村眷戶文史工作者王立皓講:「對住民來講,危機感無解除。你欲保留眷村,會當得;你愛共眷村的人,佮真真正正ua̍h-lìng-lìng的眷村生活款保存,是人寫文化,毋是土地佮厝咧寫文化。」

眷村住戶猶未放棄。另外針對判決,空軍司令部表示,41間歷史建築會保留,毋是文資的範圍會攏總拆除,若是縣府閣提出文資審議,in嘛會尊重結果。

相關新聞