立委質疑禁用潘飼豬力頭傷重 農委會:非常時期

為著欲防止非洲豬災,對9月開始禁止豬農用潘飼豬。農委會是強調:最近當咧緊張,禁止用潘是較安全的選擇。有環保團體煩惱加出來的潘,會成做一項新的問題。環保署講,有補助縣市政府設立漚肥、發電等等設施來處理。

一隻一隻的豬攏𤲍做伙,搶咧食飼料,遮的豬原本攏是食高溫煮過的潘,為著防止非洲豬災,行政院要求九月份暫時改做食飼料,雖講政府有提供一隻豬500箍的補助,但是豬農講,根本無夠。

豬農黃正祥表示:「一隻豬一個月來講,差不多食一千箍的飼料錢,用潘來講的時陣,大概占飼料差不多兩成左右,等於是加八成的成本。」

農委會畜牧處牧場管理科科長,葉昇炎表示:「每一个人的飼養成本無仝,阮用的是固定的價數,阮無法度針對孤一个豬農伊家己的成本,去做講愛符合伊的需求。」

嘛有環保團體煩惱,禁止用潘飼豬,加出來的潘按怎處理,成做一項新的問題。環保署講,有補助縣市政府設立堆肥、發電等等設施來處理。

環保署環境督察總隊科長,李易書表示:「遐爾大量的潘雄雄入來,其實會影響本來的操作體系,所以阮目前事先提供,焚化廠佮掩埋場先處理,慢慢一步一步,引導去當初13億補助的設施。會沓沓來,袂使一擺入去。」

黃正祥認為,潘若堆肥處理,需要3個月的時間,若是高溫煮過,確認安全予豬食,8點鐘豬就會使消化,是較好的處理方式。環保署佮農委會講,雖然過去稽查,攏無發現豬農無煮潘就去飼豬,但是這段期間,完全禁止是較安全。

全台敬老金大調查

相關新聞