非洲豬災透過肉製品入臺 政府嚴查越南商店

前一站仔,一寡越南店仔的豬肉製品,有驗出非洲豬災病毒,政府嘛開始稽查越南商店。毋過有立委表示,佇網路頂頭猶是會當揣著一寡越南肉乾,恐驚會造成非洲豬災的防疫空縫。

行政院長蘇貞昌31到台北港,視察貨物通關的流程,嘛佇現場聽有關防範非洲豬災的簡報。但是有立委講,佇網路平台看著業者咧賣越南肉乾。

立法委員邱臣遠指出:「電商平台抑是貿易商,攏公開賣越南的肉乾。評論區有今年一月開始買的評價,上架的時間已經超過8個月,甚至閣較久」

邱臣遠表示,雖然業者寫肉乾產地佇台灣,但是恐驚會有前一站仔捌發現的,肉品違法濫摻的問題,成做非洲豬災的破口。

邱臣遠補充:「伊寫越南牛肉乾,但是閣寫產地佇台灣,阮就懷疑伊是肉品的半成品,入來台灣加工,抑是實際佇台灣生產的,抑是規包的肉品對越南走私入來」


行政院長蘇貞昌表示:「只要有可能走私,抑是可能牽連非洲豬災的肉製品,阮攏袂放過」


防檢局企劃組組長李婉如也講:「阮逐工有委託專人來查揣電商平台,若是有揣著一寡物件、特別的產品,會通知電商平台落架,閣請電商平台提供賣家的資訊,紲後做查察的動作」

防檢局表示,已經有掌握立委講的貿易商,調查發現in的產品,肉品標示是合法的澳洲佮紐西蘭的牛肉。另外一間電商平台的產品,因為資訊無清楚,已經請平台落架。

相關新聞

專題|全台敬老金大調查