嘉義防疫繼續推管樂 學校搭布棚分開練習

嘉義市一直攏有佇學校內底,推廣管樂演奏,這站仔防疫警戒,為著欲予學生會當繼續練習,有一間國中就特別安排每一个學生,佇單獨的布棚內底演奏樂器。

學生佇布棚內底歕奏樂器,離開的時陣閣愛用酒精消毒。嘉義市南興國中替管樂團歕奏樂器的學生,一个人準備一頂家己專用的布棚,予in開學了後嘛會當做伙練習。看起來那親像一粒一粒的娘仔蝦。

南興國中,李同學表示:「基本上袂講無爽快 ,閣加上足久無佮逐家做伙練習樂器,所以是誠歡喜,可能就差佇無法度佮同學開講。」

南興國中校長,柯博議表示:「老師是有想欲佮餐廳仝款用簾仔,抑是隔板的方式,毋過猶是無法度完全阻擋喙瀾鬚,所以阮的老師才想講,參考國外的做法,才設計出這款防疫的『蛹室』。」

9月初一就欲開學,嘉義市政府早時邀請市內所有國中小的校長,做伙開防疫會議,除了宣布相關防疫的方向,衛生局嘛指出一旦確診,學校需要做啥物準備。

嘉義市衛生局代理局長,廖育瑋表示:「若發生確診案件的時陣,阮衛生局就會入去學校來疫調,這時陣可能就是需要請學校來鬥相共。」 

嘉義市教育處表示,嘉義市的國中小學生攏有替in準備家己的隔枋,教室內底嘛有裝空氣循環系統,希望學生的校園身外袂閣受著疫情影響。

相關新聞

專題|全台敬老金大調查