9月禁用潘飼豬 環保署:交清潔隊處理.擲糞埽桶

為著阻擋非洲豬災,中央對9/1開始,禁止用潘飼豬一個月,環保署長今仔日特別視察新竹市的潘廠,嘛要求各縣市這兩工愛做好準備,協助民眾來處理潘。

規桶的潘水經過人工確定安全了後,直接經過機器處理,過無外久潘水就變做會使再利用的培養土。為欲防止非洲豬瘟疫情,中央宣布9月開始一個月內,全面禁止用潘飼豬,環保署提醒民眾,一定愛配合政策,阻擋非洲豬瘟。

環保署長,張子敬表示:「所有的潘水,原本有的是直接交予飼豬戶,抑是清理業者去飼豬,猶毋過這馬袂使去飼豬,所以到咱指定的地點,有的會煩惱是毋是愛納錢,我特別強調已經佮地方攏講好矣,這部份攏免錢,只要是載來指定的地點。」

目前新竹市潘水處理廠,逐工會使處理的潘水差不多12噸,若是有需要協助其他單位的時陣,上濟會使提升到18噸。

新竹市副市長,沈慧虹表示:「這個月緊急的措施,無論是用潘水處理,抑是用燒掉的,攏來阻擋病毒湠開。」

環保署呼籲,民眾處理潘水愛盡量用予焦,另外針對不明來源的肉類,應該直接擲糞埽桶,千萬毋通佮潘水囥做伙,避免造成疫情。

全台敬老金大調查

相關新聞