唐嘉鴻奧運體操排第7.歷來上好 科學運動建功

臺灣體操選手唐嘉鴻,佇東京奧運的體操全能項目提著第七名的成績,除了伊本身的努力,背後的運動科學嘛有真大的幫助。做伙來看國立臺灣師範大學按怎透過感測技術,幫助選手提升表現。

體操選手唐嘉鴻搝單槓、空中轉體,媠氣的落地。唐嘉鴻佇2020東京奧運,提著體操全能第七名的好成績,背後的運動科學是真重要。親像綁佇腰部佮跤目的慣性感測器,會使精準掌握選手的動作,幫助改善選手的落地姿勢。

臺師大運動競技系助理教授翁士航:「親像相老師伊佇操作干樂儀,予阮清楚知影嘉鴻的轉速需要達成偌濟的水準,咱才會使有閣較好的落地表現。

體操選手唐嘉鴻:「老師攏會予我數據,可能每擺無仝的差別,我會使知影講,兩擺感覺的無仝,就是我自身的感覺。」

訓練的時陣,嘛會透過使用這台離心機器,來提升跤腿的力量。單槓體操比賽落地的時,姿勢會影響分數的判定,而且選手的跤腿嘛會承受真大的衝擊。

臺師大運動競技系教授相子元表示:「嘉鴻的專長是佇單槓,頂半身的部份是無啥問題;落地的部份會有較濟的扣分,所以阮會透過一寡方法去強化跤腿。彼个衝擊必須透過離心訓練的方式,會使予肌肉去適應。離心機的訓練會使予in的跤腿去承受按呢的落地衝擊。」

翁士航講,唐嘉鴻2019年的落地,只有三十幾葩是完美成功,透過運動科學的幫贊,這馬已經提升到七十幾葩。另外體操規則每四冬會做修改,唐嘉鴻講,這馬嘛開始新規則的相關規劃,希望佇2024巴黎奧運繼續拍拚。

九合一選戰解析

相關新聞