鼓勵東奧揍身選手陳念琴 新竹市頒10萬箍獎金
張君豪 / 新竹報導
發布時間：
更新時間：
目次
臺灣參加東京奧運揍身項目的選手-陳念琴，雖然佇8強賽輸予印度選手，毋過伊無認輸的精神，感動真濟人。8/24新竹市政府特別準備10萬箍的獎金，勉勵選手繼續拚，予臺灣人徛上世界舞台。
雖然佇奧運bo̍k-sìn-gù 69公斤級八強比賽輸予印度選手，毋過台灣選手陳念琴講無論輸贏，舞台頂是成就選手上重要的所在，唚舞台毋但是尊敬比賽，更加是對對手的尊重。
陳念琴表示：「佇舞台頂一直成長，一直進步的這款感覺我真佮意。所以我嘛對家己講，未來毋管按怎，我一定欲提著金牌」
陳念琴的教練嘛共逐家分享，比賽的時陣選手佇頂懸是真孤單，教練參選手干焦會使倚靠平常時的鬥搭。
教練柯文明指出：「bo̍k-sìn-gù是單淘汰比賽，特別是佇奧運這个項目，只要輸一場就無敗部復活的機會。所以逐家會當想看講壓力有偌大」
新竹市長林智堅嘛呵咾：「陳念琴的精神，是上好的運動員模範」
提著新竹市頒發的10萬箍獎金，陳念琴嘛回送市長簽名手橐，伊講這馬已經開始準備，欲佇2024年共金牌提轉來台灣。
2022杭州亞運 台灣百金之路
