太魯閣敗馬報告 貨車無電牢車2遍.趨落崎致意外

運安會8/23公佈「臺鐵太魯閣自強號敗馬事故」的調查報告。也發現工程車輾落去進前,就已經出問題牢佇半路,閣硬欲入去工地,才會造成趨落山崎,害死遐濟人的意外。

工地主任李義祥用吊帶共牢車的貨車縛牢,另一爿掛起去怪手,想欲共車拖走。運安會23向外界說明今年4月初2台鐵408號太魯閣列車敗馬事件調查報告的事實資料,講造成事故的貨車,佇出發到工地進前,就牢過一擺。

運安會鐵道專業小組召集委員,李綱表示:「(李義祥)一透早欲出門就發見大貨車發袂振動,機電廠商幫伊接電,但是共伊講這个電池狀況無好,一般攏是講愛換電池,但是伊無隨換。」

大貨車佇工地現場閣一擺牢車,李義祥用吊帶搝車接電,煞因為吊帶遛去,規台貨車為正爿後輪趨落來山坡、硨反佇鐵枝路。紲落來列車對出和仁磅空、到挵著貨車,干焦有7秒鐘,袂赴反應。運安會閣講,過去佇仝一个所在,別台車輛嘛捌牢車。

運安會鐵道調查組組長,林沛達表示:「佇今年一月份,伊有兩擺紅毛塗車趨去仝一个位,趨兩擺了後,𪜶就佇彼个所在囥兩个交通錐,閣搝一條警示旗。」

安全單位捌提出佇遮設護欄的建議,毋過台鐵佮包商毋是無回應,就是講無編列預算。另外罹難者家屬嘛現身記者會,針對前幾工媒體報導,運安會講這層意外運氣真無好、工地主任李義祥佇彼時有努力過等等言論,是真不滿。嘛要求行政院長出來面對家屬。

罹難者家屬,陳先生表示:「9點27分吊帶就已經脫離,干焦看著移工阿好佇鐵枝路邊,有做擛手的動作,按呢我想欲問,李義祥這陣咧創啥物?

運安會講,這擺的報告是根據紀錄器、訪問等等的資料來還原事實,會公開囥佇運安會的網站。未來閣會進一步公佈分析調查,佮針對台鐵內部的管理、佮包商的接觸等等,提供善的建議。

相關新聞

專題|全台敬老金大調查