嘉義布袋發起放魚栽入海 促社會重視海洋資源
林緯廷 / 嘉義報導
發布時間：
更新時間：
布袋的漁民，佇8/20參加嘉義縣政府所舉辦的，放魚栽活動，這改放的魚栽，有枋頭佮午仔魚這兩種。縣政府嘛強調，放魚栽，是維護海洋資源的方法之一，毋過袂當私底下舉辦，這愛依法申請。
主辦單位，張宏富表示：「放枋頭仔佮一寡小石斑來講，予大海會當生生不息，而且逐冬咱的白海豬，攏需要食枋頭仔，才會當繼續生存落去，予白海豬無食物的話，𪜶就會離開咱嘉義這个所在。」
這改放流的魚栽有10萬尾，縣政府表示，漁業資源受氣候佮環境的破害，閣加上漁業技術進步，所以資源是愈來愈少，透過放流魚栽，是增加漁業資源上直接的方法之一。
在地漁民張先生表示：「共魚仔掠了了，後一代人就無魚通好掠，愛共資源留予後一代人。」
嘉義縣政府漁業科長，張建成表示：「放流的魚栽仔有兩種，一種是四絲馬鮁，咱攏叫這是午仔，另外一種是黃錫鯛，就是咱咧講的枋頭。」
農業處指出，魚栽放流著向政府申請才會當舉辦，針對放流魚種佮地點嘛攏有規定，若無，顛倒可能破害海洋生態佮環境。
