嘉義縣失智據點全開放 防疫代先.序大安心

佇全國人口老化比率上懸的嘉義縣,因為疫情的影響,社區的失智據點攏暫停服務。毋過據點的工作人員,攏已經注過疫苗矣。這馬會當予序大,安心轉來據點上課矣。

綴老師的動作跳舞,嘉義縣六腳鄉的序大,總算會當閣出來上課,逐家的心情攏袂䆀。

上課長輩,劉女士表示:「因為攏關佇厝內底,會變孝呆,出來上課感覺足好。」

上課長輩,蔡女士表示:「足歡喜,因為足久無看著遮的同學。」

嘉義縣全縣有29搭失智據點,佇18全面開放。管理單位表示,為著欲予序大會當安心轉來上課,防疫措施攏愛規劃好勢。

嘉義長庚病院社服課副課長,蔡雅清表示:「阮其實目前攏是愛預約才會當來,就是講共人數控制佇一定的數量,然後活動的部份,阮會保持社交的安全距離,過程攏愛掛喙罨。」

嘉義縣衛生局長,趙紋華表示:「照顧的工作人員攏有注預防射,老序大嘛愛有注過才會當轉來上課,所以阮佇失智據點的部份,阮有提早做準備,目前攏已經正式開課。」

嘉義縣政府表示,目前縣內50歲以上的失智人口有8000外人,全縣29搭失智社區據點,照顧400外位序大,這馬閣開放上課,毋但序大歡喜,家庭照顧的壓力嘛會當減輕。

全台敬老金大調查

相關新聞