疫情降.國旅無起色 業者:望閣推安心旅遊補助
鄭雅文 張育睿 / 台北報導
發布時間：
更新時間：
雖然已經降做2級警戒阿，毋過國內的觀光猶是無恢復，因為民眾心內猶是會驚。觀光產業就希望政府會當像舊年仝款，除了振興券以外，會當增加安心旅遊補助
二級防疫期間，雖然開放國內旅遊，毋過最近發生花蓮親友團的感染事件，本底恢復狀況就無蓋理想的觀光旅遊業，又閣回到原點。
台灣旅行業國民旅遊發展協會理事長 賴俊傑講，「目前阮遮的業者，攏猶無接著傷濟的團，攏一寡少數 散客，莫講最近的新聞，嘛是予阮閣受著重擊。」
民眾旅遊的意願變保守，閣過無偌久就是中秋連紲假期，業者真煩惱無人來，有人呼籲政府趕佇歇假進前緊發振興劵，閣較希望比照舊年提供預算予觀光發展基金、結合振興劵予消費者來使用，IN才會當共這站仔的損失趁轉來。
台灣觀光發展協會副理事長 柯牧洲表示，「對觀光業來講，阮猶原是希望觀光局會當撥一寡仔預算，予旅遊業佇安心旅遊的部份，會當閣再來操作。」
業者講，舊年的安心旅遊，政府結合飯店業者等等，予民眾蹛歇有優惠價數，彼陣投資90億創造欲630億的消費，希望這改的五倍劵會當依照早前的模式，才通真正救著IN。針對業者的訴求，交通部觀光局表示，已經有聽著相關意見，也會閣向行政院來報告爭取。
2022杭州亞運 台灣百金之路
