美麗華罷工100日 工會閣再抗議資方毋願協商

美麗華開發公司因為企業分割共員工辭頭路,落尾引起工會罷工,到今已經3個外月。工會指控公司,失約背信無出席勞資協商會議。而且質疑企業分割的目的是欲共工會的成員辭頭路。

美麗華工會18早時,為著欲向新北市消保會陳情,佮警方發生激烈衝突。美麗華開發公司因為公司分割,落尾閣解雇員工,引起工會發起罷工,到18已經滿100工。工會指控,16的勞資會議,資方是背約無出席。

桃園市產業總工會秘書 葉瑾瑜講,「拜一(8/16)下晡兩點,勞工局約雙方代表討論新版本,想袂到下晡兩點到四點資方攏無人出席。」

新北市勞動關係科科長 賴彥亨vs.桃園市產業總工會秘書 葉瑾瑜講,「請問佗一工會使出席協商會,阮會繼續邀請雙方。」

美麗華資方表示,工會的指控毋是事實。毋過無做進一步解說,干焦講會繼續佮工會尋求共識。另一方面,工會嘛懷疑,美麗華資方分割公司,是為著解雇工會成員。

桃園市產業總工會秘書 葉瑾瑜講,「分割後美麗華開發母公司賰22人,其他杏中27人、美杏28人、杏美24人,到底為啥物美麗華開發22人,7月底申請紓困的時陣,會使以88人去申請,阮就質疑你的分割是毋是只有解雇工會成員的時陣,才是進行企業分割。」

新北市經發局表示,工會的意見,閣需要調查。工會講,今仔日嘛會發函予經發局,希望駁回資方的紓困申請佮企業分割案。

全台敬老金大調查

相關新聞