臺北親子館今開放 家長歡喜𤆬囡仔消敨體力
鄭雅文 張育睿 / 臺北報導
發布時間：
更新時間：
臺北市對8/17開始，開放親子館予民眾來𨑨迌。袂少家長已經先佇網路登記。有人講，囡仔踮厝傷久傷無聊，而且公園也猶未開放遊樂設施，這馬加一个空間，予囡仔消敨體力，也袂䆀。
佮囡仔做伙耍𨑨迌物，台北市親子館8/17開放，袂少家長𤆬囡仔來。
家長表示：「因為這馬毋是(三級)解封矣，囡仔踮厝傷過無聊矣。」
「我感覺真好，若無囡仔攏無所在通去，就干焦會當佇空地，走來走去爾爾。」
有家長真歡喜至少有所在通予囡仔消敨體力，𪜶也會當小歇喘一下。社會局表示，原則上來遮的親子攏愛先上網路預約，無提供現場的候補。工作人員也會佇室內提醒逐家保持社交距離，𨑨迌物耍了也會連鞭清潔消毒。
北市社會局婦幼科長，粘羽涵表示：「阮這馬是會保持社交距離，所以阮入館內的人數，毋是干焦減半降載，阮攏是符合中央指引，就是室內人數袂超過50人。」
社會局指出，目前，親子館人數攏有限制，會閣看兩禮拜後的狀況考慮欲按怎調整。另外新北市因為大部份親子館攏佮托育中心做伙，考量托育的安全性，目前並無開放的規劃。
2022杭州亞運 台灣百金之路
