高雄五倍券按加1千箍 店家也推優惠拚經濟

配合中央的五倍券,真濟縣市政府喝講欲加錢,高雄市規劃欲加一千箍,另外地方商圈的店頭,嘛做伙推出無仝優待。真濟業者攏希望市草較好咧,加趁寡錢,恢復正常的營運。

鳳山黃埔新村內底,這个日本舊厝民宿誠有特色,毋過這站仔觀光產業因為疫情受害嚴重,少年頭家Mayu手頭有兩間民宿,這三個月攏無人來蹛。

民宿老闆,Mayu表示:「對五月中旬大退訂,阮嘛是配合政策退訂退錢,一直到昨昏八月十六才有人客。」

毋但民宿,餐廳生理嘛賰無到一成,這間店一直到頂禮拜歇睏日,店內才開始有人客,總算是等著解封,這馬政府閣推出五倍券,鳳山遮的業者趕緊組聯盟,有民宿、餐廳、文創等等22間店,欲做伙合作。

有餐廳業者表示:「全部鳳山店家有聯盟,人客來有辦法知影這間店,毋免一間一間一間去揣。」

餐廳業者,何比堅表示:「一般消費額攏是一百兩百,若是袂當找零星,希望小面額的,會當比例增加。」

其實配合五倍券,高雄市嘛宣布欲加一千箍,予五倍變六倍,唌民眾來高雄消費,地方政府佮民間,攏推出優惠,高雄市府表示,目前當咧佮商圈、夜市討論,會共資源整合才推出,希望共錢留佇高雄。

全台敬老金大調查

相關新聞