珍貴保育類猴面鷹 屏東林管處.屏科大合作紀錄

臺灣的猴面鷹是一級的保育類動物。最近屏東林管處佮屏科大鳥類生態研究室合作,咧記錄猴面鷹的岫,閣有鳥仔囝的生長過程,所有的影片攏囥佇網路,實在真古錐。

猴面鷹的鳥岫,攏佇草仔埔內底,暗時看著猴面鷹阿爸掠一隻鳥鼠轉來,五隻鳥仔囝搶欲食,猴面鷹鳥仔囝,規身軀白色若親像棉仔球,毋過愈來愈大漢,就變成蘋果面的妖怪,屏東林管處最近共這个影片囥佇網路,予大家看著猴面鷹古錐閣奇怪的模樣,研究人員嘛發現,猴面鷹會使用人工的棲架。

屏科大鳥類生態研究室研究員洪孝宇:「鳥仔囝欲離岫時陣,有幫伊縛黃色跤環,是會當佇暗時辨識,有幾隻佇別的棲架予阮翕著,知影這隻鳥仔是啥人佗位出世的。」。

屏科大鳥類生態研究室,佇屏東猴面鷹會出現所在,設置21个棲架,頂頭攏有翕相機,經過一冬外的記錄,這嘛是in第一擺做猴面鷹個體監測,因為in蹛的草仔埔減少,目前估計全臺干焦賰三、四百隻猴面鷹。
屏東林管處育樂課技正楊中月:「食鳥鼠藥的鳥鼠,二次中毒的情形,閣有非標的鳥網危害,造成生存壓力,研究發現確實是按呢,紲落來透過友善農業的操作,農民使用鳥鼠藥減少。」。

研究人員希望透過影像,了解猴面鷹生活的所在,嘛推廣無毒的環境,予猴面鷹數量會當沓沓仔增加。


 

相關新聞