桃源斷橋僫搭便道 公路總局央倩專家鬥相共

高雄桃源山區的明霸克露橋,初7去予大水沖斷去了後,公路總局拍拚咧修理,毋過13閣拄著水崩山,進前的進度規的烏有去。禮拜下晡,公路總局揣專家學者來鬥相共,討論調整施工方向。另外,山區的居民生活物資佮煮飯的瓦斯,公所按算先用流籠載起去。抑若失去聯絡的謝宜真代表,到今是猶未揣著。

兩分鐘的水崩山,予公路單位從8月初7以來,規禮拜的辛苦攏烏有去,明霸克露橋便道,原底按算通車時間會當提早到20,毋過13的土石流共搶通的進度沖歹去,目前雖然無全面停工,毋過干焦會當佇勤和段較安全的地點施工,為著強化安全佮橋的品質,公路總局15下晡揣成大的教授來鬥相共。

公路總局第三區養護工程處甲仙工務段長陳正偉表示:「看敢會當提供閣較濟,延長預警的方式,閣來是搶通的時陣,敢有其他行的方式或者是管理方式,對過路人的安全性會當更加提升。」

公路單位希望透過學者的建議,調整施工的方式或地點,頭起先,先將施工人員佮機具預警欲撤離時間,對原本2分鐘搝長到5分鐘;抑若山頂的居民,目前上蓋欠缺煮飯的瓦斯,公所也研擬先以流籠的方式送起去。

高雄市桃源區長謝英雄表示:「搭流籠嘛愛有一個穩定的基礎,所以嘛愛考慮對岸,對岸的彼的位敢有安全,所以一定要實地勘查,一定要實地勘查才會知影。」

區公所表示,進前莫拉克風災了後,當地居民嘛捌使用流籠出入,毋過為著安全,著愛詳細揣較適合的地點,恐驚袂佇這兩天內就處理好勢。
 

全台敬老金大調查

相關新聞