六輕3座燒機組 擬2025年改天然氣發電

雲林六輕工業區內底的麥寮電廠,有三座燃塗炭的機組,按算2025年會轉型做燒天然氣的。在地的民間團體雖然肯定作法,毋過也講這台塑的石化廠,猶有16座汽電共生的機組,燃塗炭的量差不多是臺中火力發電廠的3分之2,In也呼籲經濟部趕緊處理。

雲林縣六輕工業區煙筒煙衝真大,附近居民是真煩惱。在地的民間團體指出,六輕19座發電機組內面,麥寮發電廠有承諾3部燒塗炭機組會佇2025年轉型改燒天然氣,毋過另外台塑石化3廠的16座汽電共生機組,是猶無計畫。

六輕傷害聯合求償自救會會長黃源河指出:「塗炭改天然氣,阮是肯定按呢的方向。但是阮嘛發現伊干焦申請三个機組,六輕內底猶有16个機組,3个之外猶有16个機組,為啥物干焦申請3个」
民團指出,台塑16座汽電共生機組燒塗炭的量,差不多是台中火力發電廠3分之2的量。在場的立委嘛表示,應該愛積極減碳,除了會使提升產業競爭力,嘛是企業負起社會責任的表現。

經濟部能源局副局長李君禮表示:「阮長期當然希望伊沓沓仔換掉。佇政府方面,目前阮對燒塗炭火鼎的使用,環保署嘛會訂定較嚴的管制標準」

能源局講,目前對遮16部汽電共生機組是用鼓勵的態度,無強制要求換掉,但是排放標準會逐年提懸,業者若是無欲換,就愛想辦法來符合愈來愈嚴格的標準。

全台敬老金大調查

相關新聞