阿里山火車開放 逐工只有1幫往回.限108人

想欲去阿里山坐火車的民眾愛注意囉,雖然是對8月初10開始恢復營運,毋過火車是對嘉義火車頭駛到畚箕湖爾爾,而且一工只有一逝,限定108人。


欲去阿里山的遊客,早時仔就來到嘉義火車頭欲坐阿里山火車。開放第一工就坐著車,遊客是誠歡喜。

坐車遊客林小姐:「歡喜,主要天氣好會當坐著火車,行程會當順利,攏真歡喜。」。

坐車遊客劉小姐:「阮領隊昨昏暗時問著,然後早時仔六點外買票的。」。

阿里山林業鐵路因為疫情的關係,對5月18暫停營運到8月9號,今仔日正式恢復營運,嘛開放訂票,第一工佇嘉義火車站就有26位遊客買票坐車。

林鐵文資處副處長周恆凱:「本線嘉義到十字路區間,目前只有駛到奮起湖車站,而且沿路干焦停嘉義 北門 竹崎,交力坪佮奮起湖5个有站務人員的車站,來控管人流。」。

除了對嘉義駛去阿里山的火車有開放,佇阿里山國家森林遊樂區內底的3條火車支線,嘛有限制坐車人數,林鐵文資處呼籲,相關的防疫規定,請遊客嘛是愛配合。


 

相關新聞

專題|全台敬老金大調查