嫁來臺灣學臺語 香港太太創作"台語貓"推臺文
陳嘉筠 賴威佐 / 高雄報導
發布時間：
更新時間：
高雄有一對翁仔某咧推廣台語文，閣創作出一隻古錐的「臺語貓」，用這隻貓仔的尪仔圖，猶閣有繪本，紹介臺語的文字。毋過這位太太是香港人，嫁來臺灣才學講臺語，伊也發現講，高雄無講台語的環境，實在真可惜。
伊叫April，對香港嫁來台灣才五冬，就佇這間店展出伊的插圖，不管是鹹酥雞、蚵仔煎、紅豆餅抑是割包，遮的台灣點心插圖攏有一隻古錐的貓仔佮羅馬字，這就是伊創造的，一隻會曉講台語的貓仔。
插畫家 April：「逐家那看圖那臆看覓，可能就知影，喔~原來台語會當按呢寫。所以用圖佮字去宣傳台語。」
其實April是教瑜珈的老師，畫尫仔圖是伊的興趣，會開始學台語，是因為嫁來高雄，翁婿厝內攏講台語，而且in翁婿“蝦米”專門咧推廣台語文，伊嘛想欲學習台灣的文化佮歷史。
插畫家 April表示：「開始的時陣就學字，無感覺羅馬字抑是白話字困難，因為伊親像英文，香港人有學英文。」
這馬讀佮寫台文，對April來講無困難，毋過伊想袂到佇高雄蹛四五冬，學講台語煞真困難。
插畫家 April：「台灣這馬無全台語的環境，所以較困難，袂接觸著台語，生活內底就是無，所以愛讀冊、揣辭典，用文字的方式去學習。」
April佮蝦米，做伙用台語貓的光批、牌仔、T-shirt閣有繪本，四界推廣台語文，一个香港人咧學台語，顛倒嘛予真濟人有興趣，做伙來學台語文。
2022杭州亞運 台灣百金之路
