咱東奧獎牌數創紀錄 猶著國家培訓.全民支持
洪敏真 林郁凱 / 台北報導
發布時間：
更新時間：
這回咱去東京奧運所拚著的獎牌，已經破紀錄啊! 就有專家認為國家除了愛增加培訓的名額，也愛予選手豐富的訓練資源。對一般的民眾來講，也愛培養全民運動的風氣，需要頂頂下下攏來支持體育運動。
掌握節奏、誠gâu坳手目桮球，19歲的林昀儒，佇桌球賽的表現，予世界看著台灣選手的實力，2018年台灣體育署的黃金計畫，小林就是其中一為重點栽培的選手。
體育署競技運動組專門委員戴琬琳表示，「伊會有專屬的教練、防護員、物理治療師、陪練員或者是情蒐，伊嘛會有專屬的訓練器材、裝備，也會提供伊全面化的運動科學資源。」
這三年台灣計共橐12億佇黃金計畫，除了小林同學、包括戴資穎、李智凱、郭婞淳、文姿云等等38人，11項運動項目攏在內[，不過專家認為，咱應該愛跳脫過去體育班培訓菁英的思考，這改代表國家出去比賽134位，每一位攏是gáu人，應該攏愛列入計畫中。
球評石明謹講，「教練啦，或者是你訓練的費用，本來就是國家愛承擔的，毋是講彼38个才有。」
除了改善干焦針對特定選手的培訓以外，學者表示，紲落來咱若欲繼續有傑出的表現，需要有全民運動的風氣。
政治大學傳播學院教授兼研究暨發展中心主任劉昌德講，「予台灣的運動文化和運動人口增加，會當培養出閣較濟有天份的選手，也會當擴大規个社會，包含政府，包含企業，包含一般消費者，對運動員和運動的熱愛佮支持。」
這改頭擺參加奧運就提著好成績的少年選手，包括射箭少年兄湯智鈞、跆拳道少女羅嘉翎和拳擊選手黃筱雯等等，予台灣體育界出現新希望，選手攏望全民運動的風氣持續，對社會到國家，繼續予in鼓勵和支持。
