青創貸款免息8/2提早結束 立委:政策袂當跳票

行政院舊年推動青年創業貸款,其中經濟部辦理的金額是100萬以下,政府會補貼五年的利息,煞因為傷濟人來申請,原本欲執行四年,無到1年就共預算開了了,欲提早佇八月初就結束。就有立委呼籲政府,對少年人的政策袂當跳票。

行政院對舊年八月啟動600億的青年創業貸款方案,其中額度100萬以下,政府會補貼前五冬的利息。因為條件優惠,真濟人搶欲辦,毋過原底4冬的計畫,猶無一冬,利息補貼的預算就開了矣。這陣閣傳出計畫欲提早佇8月初2就結束。

青年林美琪表示,「若減去貸款利息的補貼,無疑是打擊青年創業意願的決定,畢竟創業已經真辛苦,閣愛予錢逐咧走,這會予真濟創業家來勼手。」

原本欲申請貸款的林小姐這馬就毋知欲按怎才好,伊認為拄著疫情,閣較需要政府幫忙。幾若位民進黨立委也佇會中批評經濟部,當初思考無周全,這馬閣較愛想辦法做滿四冬的優惠補貼,對青年的承諾袂當跳票。

經濟部中小企業處副處長陳秘順講,「青創貸款繼續辦,而且一百萬以下十成保證,這攏有咧繼續辦,毋過利息補貼這个部份,掠準有適當的財源,行政部門閣通做政策決定了後,就會對外公開。」

經濟部指出,主要是利息補貼錢無夠,未來敢欲先收件閣再回頭執行,閣咧討論。立委邱志偉是表示,自計畫到今有兩萬八千外人申請,利息補貼是上大誘因,呼籲政府著緊揣財源予政策行落去。

相關新聞

專題|全台敬老金大調查