電動車愈普遍 車主:欲設充電站猶予社區拒絕

咱臺灣目前有1萬4千外台電動轎車,若照這馬的規定,新起的建築物,攏愛留電動車的充電設備佮空間。駛電動車的民眾表示,有真濟社區的管委會,對充電站的安排有爭議,提出欲充電設備的需求,煞攏被拒絕。

接起去充電口,替電動車充電,英國、法國等等國家按算佇未來停止賣汽油車,電動車成做新的議題。雖然營建署講,這馬對新的建築有要求,愛留充電設備的空間。毋過台灣有濟濟電動車主講,欲佇家己的停車位設充電站是真困難,因為社區管委會定定否決設立充電站的要求。

電動車主 Angela講,「有一寡莫名其妙的驚惶,管委會感覺裝這个充電站佮裝一台冷氣仝款,搝這个電源,伊就會破壞規个大樓結構,甚至會造成火災。」

能源局講,這馬當咧收集民眾替電動車充電的時陣定拄著的問題,欲製作一本手冊來予逐家參考,降低疑慮。台電嘛講,過去社區設立充電站、定定攏是各車主家己對電表搝線到車位,這馬有推出一套新的建議做法,予車主佮管委會參考。

台電公司配電處 蔡緒良組長說明,「申請專設一戶電表,整體規劃裝設電纜線架,以後若是有車主有需求,就會使對線架就近搝線到家己車位。」

但是社區管委會、抑是社區區分所有權人會議,攏定定否決設置私人充電站的問題,佇公聽會猶是無得著解決,立法委員陳椒華表示,猶閣需要函請行政院消保會另外召開會議,進行法規的了解佮討論,解決車主的需求。

全台敬老金大調查

相關新聞