降做二級警戒了後，國內旅遊也是帶條件恢復。毋過就有專家煩惱講，咱誠無簡單才重新起步的觀光業，會因為人流控管無做好勢出問題；因為各地頭景點的主管機關無仝，呼籲中央著愛整合人流警示系統。
解封了後猶未到假日，外口人潮明顯變濟，有立委就參學者、觀光業者等等開記者會，要求政府愛整合各地的人流警示，降低旅遊對防疫的風險，才會通予觀光產業通行久長。
中華民國旅行品質保障協會主委李奇嶽:「譬如講森林遊樂園是啥人管，林務局毋是交通部的，真濟農場啥人管，咱佇足濟單位管理下應該是咱政府機關愛，想辦法主動出擊。」
因為真濟景點是各地方政府管控人潮，無統一性的警示系統，民眾真僫查詢，有學者表示，最近看著高雄有漁港kheh滿遊客，工作人員用傳統濟計算器叫逐家排隊，顛倒可能造成群聚感染，希望政府通用資訊科技來改善。
環球科技大學觀光與生態旅遊系副教授 陳泰安:「未來像按呢的一種旅遊品質的管控，牽涉著遮个承載量的限制，抑是咱愛積極管理的。」
有立委表示，過去像交通部的1968就結合電信業者的全國景觀平台，利用簡訊做人潮示警，是毋是考慮通恢復。交通部表示，進前是配合疾管署政策執行，紲落來也愛看敢有相關指令，疾管署表示會蒐集相關意見做討論。
