新北視障者.庇護工場員工 今日起開始注疫苗
洪敏真 林郁凱 / 新北報導
發布時間：
更新時間：
目次
新北市對7/27開始，替視障者和庇護工場的員工注疫苗，希望冗早注煞，早一日轉到正常的生活。毋過庇護工場表示，雖然已經降做2級警戒，這生理猶是花花仔，無啥人客。
視障者坐定，醫師sak簡單的車仔，替in問診，才閣由護理師來注射，亞東病院捷運站的連通道，變臨時注射站，列佇第五類的視障朋友講，總算等著in注矣。
視障者:「是阮的工會協會去爭取，才有這个機會會當緊注。」視障者:「疫情若無解除，願意來掠龍的人，意願可能攏無懸。」
雖罔列佇第五類，不過因為毋是照顧機構，較屬於工課場，所以配著疫苗的速度較慢，新北市勞工局向衛生局申請專案方式，先替身障者和庇護工廠相關人員，計共1700外位造冊，拍算八月初五進前注煞。
新北市政府勞工局科長 盧志銘:「身障朋友阮攏會用敲電話的佮in聯絡，共in講對佗一个捷運站出來，阮攏會共in引導，捷運站的警察彼爿會予in知影今仔日，會有足濟身障朋友會來注疫苗。」
就算中央宣布防疫警戒已經降做二級，不過庇護工場的生意猶是無起色，眾人猶是希望緊注著疫苗，冗早恢復正常生活。
專題｜改造地獄路 台灣行人路為何難行？
