疫情警戒佇7/27降到二級，毋過彰化縣的社區關懷據點，暫時無欲開放，仝款有做飯包，毋過袂使共餐，真濟老大人攏希望早一日恢復正常，轉去關懷據點看老朋友。
這段時間為著防疫，社區據點無開放，人員也敲電話陪長輩開講，消敨心情。
雖然國內疫情警戒對7月27開始降到二級，但是彰化縣內的社區照顧據點猶原無開放，原本的共餐活動也攏改用飯包的方式予長輩紮轉去厝內食。
彰化縣南佃社區理事長 陳淑美:「目前咱關懷據點，咱是停止的狀況，但是阮的灶跤猶原無停，因為咱驚咱的序大佇厝無來無中晝頓通食，所以阮嘛是仝款煮，予in家己出來捾。」
拄開始國內疫情當嚴重的時，志工嘛是會驚，但為著社區長輩猶是逐工攢中晝頓。社區志工:「喙罨攏掛兩層，逐个攏會驚，驚嘛是愛來，遐的老人愛來捾轉去食。」
社區長輩:「我來捾飯包，這真貼心，攏來煮予阮食。」
這段時間因為疫情關係，社區據點的相關活動已經暫停兩個外月，改用電話關懷，線頂活動等等的方式，長輩期待疫情愈來愈穩定，會當早一日轉去社區據點做伙活動。
