屏東傳統市場安監視.放送系統 隨時管控人陣

7/27全國就欲降做二級的警戒矣,出外行踏的民眾一定會變濟,傳統市場閣較毋免講。屏東一寡市場,就有安監視兼廣播的系統,里長透過手機,就會當隨時知影情形。若傷濟人,嘛會當隨廣播放送,提醒民眾注意。

來到屏東市中央市場,實聯制佮酒精消毒是上基本的,若無做,市仔口這支電眼攏翕起來,里長提出手機仔,電眼畫面毋但看會著,閣會當馬上廣播,「平和里里長辦公室廣播,下晡四點,咱的環保局和市公所會來做一个環境消毒。」

這是地方有線電視公司佮市公所合作,電眼佮廣播系統,直接佮手機仔連結,就算是里長人無佇現場,攏會當監視市仔口民眾的狀況。擔仔商講,「較好,訊息先予阮了解,會當掌握遮出入人口濟少。」

屏東市平和里長伍靜華表示,「人對這个出口流動傷濟的時陣,我mái-kù,我就開手機仔來共人客提醒一下。」

潮州的中正市場,仝款有裝這个新的防疫電眼,因為遮平常時人車嘛袂少。

民眾張先生講,「按呢防疫效果較好,會當保持社交距離,會當知影人流動。」民眾表示,新的監控系統,嘛會當了解市場的治安佮交通,就算是後禮拜降級,猶是著管控市場人數,才會當做好防疫。

九合一選戰解析

相關新聞