國家語言發展會論壇 招全民探討推廣本土語言

咱台灣人的母語一直咧消失。文化部、教育部、客委員和原民會宣布,四个部門欲合作,會召開幾落場線頂論壇。希望逐家做伙來討論辦法,共咱的母語傳承、搶救轉來。

臺灣有豐富的本土語言,過去六十外冬因為歷史佮政治因素,華語成做強勢語言,文化部對七月底開始欲舉辦2021國家語言發展會議,透過八場線頂論壇,邀請全民做伙參與國家語言發展相關議題的討論。

國家語言發展會議計畫主持人許慧如教授:「過去台灣有一段真長的時間攏是獨尊華語,希望透過這擺國家語言發展會議做一个開始,會當予咱的全民對本土語言的認捌,會當有一个意識。」

文化部長李永得表示,語言權是文化公民權真重要的表現,雖然這陣有國家語言發展法,保障本土語言的傳承參推捒,但也需要對生活中落實,共母語講轉來。

文化部長李永得:「社會整體的發展趨勢,本土語言也面臨真嚴重的流失,希望透過多元化、生活化的內容,予民眾重視珍惜家己的母語。」

這遍的國家語言發展會議對7月31開始到8月底,有8場線頂論壇,佮15場藝文活動,有專業學術討論,也有生活化的推廣活動,詳細的參與辦法,會當上國家語言發展會議的網站查詢。
 

全台敬老金大調查

相關新聞