新竹市關新里平均年收入286萬 全國上好額
張君豪 / 新竹報導
發布時間：
更新時間：
根據財政部2019年度綜合所得稅的資料，全國平均年收入上懸的五个里，攏佇新竹縣市，其中新竹市東區的關新里，平均年收入是286萬，會當講是全國上好額的里。
一棟一棟全新的大樓，邊仔閣有公園綠地，遮是新竹市關新里，根據舊年綜合所得稅的報稅資料顯示，這爿是全台灣上好額的所在，蹛遮的人一年的平均收入有286萬。
關新里里長黃雅卿表示，「里民的結構大部份攏佇科技業上班，科技業的工課攏是責任制，精神的壓力是真大，所以in趁錢是非常辛苦。」
附近居民講，「一寡民眾無知影逐家攏真辛苦趁錢，有的做經理的，逐工無日無暝為公司付出。」
因為這爿倚近新竹科學園區，閣加上附近有商圈方便買物件，真濟科學園區的上班族會選佇遮買厝。
房仲業者黃俊富說明，「會使買園區門口的，當然以這爿優先為主，除非是有重劃需求，抑是有高鐵需求的人客。」
因為有科學園區的關係，毋但提懸新竹縣市的平均收入，嘛搝懸附近新厝的價數，毋過想欲有好的收入，相信嘛是愛有相當辛苦的付出才有機會。
2022杭州亞運 台灣百金之路
