太魯閣敗馬調查報告 家屬批評臺鐵推責任

交通部7/18暗時,公佈臺鐵太魯閣自強號,行政調查報告,時代力量今仔日開記者會批評,講這報告的內容,攏是講包商有偌濟責任,臺鐵煞做一个無事人仔。嘛有家屬表示,臺鐵的態度是無要無緊,真濟交通部的決定佮消息,攏是看著媒體報導才知影的。

交通部18暗時公布台鐵太魯閣號行政調查報告,有罹難者家屬認為,這份報告佇5月底就已經完成矣,煞到7月份才公布,是真不滿。替部份家屬召開記者會的時代力量嘛批評,報告內面,台鐵干焦欲掰離責任,予人看無台鐵欲改革的決心。

立法委員邱顯智講,「提出一份和解書,和解書的內容基本上就是一个字攏袂使改,然後共逐家講,真濟人簽和解書矣,逐家愛緊來簽,簽了後就由台鐵來告遮的包商,敢若台鐵攏無責任仝款。」

罹難者家屬組織的自救團體表示,台鐵對家屬的態度是真凊彩,真濟消息家屬攏無法度佇第一時間知影。自救團隊委任律師陳孟秀講,「其實逐擺家屬得著的資訊攏毋是台鐵直接共家屬講的,台鐵佮家屬之間有一个群組,但是我拄仔講著的1570萬補償金這个數字,家屬是對媒體報章雜誌頂懸知影的,為啥物台鐵共失去家己親人的家屬,當做是這件代誌的局外人。」

太魯閣的眼淚團體發言人王薇君講,「你是毋是會使佇這个家屬佮官員,百外人的群組內底,共家屬講我部長要意恁家屬的心理感受,所以只要無違反法令,阮就來討論一下,有結論的時陣阮會第一時間共逐家講。」

交通部講,關懷慰問家屬的工課,攏一直有咧進行,部份家屬反映無事先通知就公布,交通部會來改進。嘛會參考家屬的意見,來檢討、改革台鐵。

相關新聞

專題|全台敬老金大調查