小解封後頭一个歇睏日 陽明山溢4千人入園

今仔日是三級警戒小可放冗的頭一个歇睏日,陽明山國家公園管理處,停車量有總量管制,上濟袂當超過四成,毋過今仔日早起十點,有濟若个停車場,就超過四成的停車量囉,而且,下晡的車是閣愈濟。

早起十點外,陽明山二子坪停車場停甲滿滿滿,到了下晡兩點外,欲停車的人猶是真濟,不過…….「卡片額尾不足」,民眾講,「按呢就袂當入去,伊這無法度直接補錢入去,只會當退出矣。」

就驚金錢接觸傳染,現場干焦收電子票證,民眾悠遊卡錢無夠,干焦會當bak-kuh駛走。微解封頭一个周末假期,陽明山人潮明顯增加,除了室外的步道開放,室內遊客中心和各服務站,維持逐人2.25平方公尺總量管制、販賣部攏開,不過愛照雙北防疫規範,停車場像擎天岡、夢幻湖等等,總量管制40%內。

陽明山國家公園管理處發言人張順發:「早起十點冷水坑佮擎天崗的停車場,就已經達到四成的上限,所以今仔日看起來人佮車也較濟小可仔。」

抑但餐廳攏啥人開,不過會當出來行行咧,民眾猶是真歡喜。民眾表示,「想講鬱佇厝足久矣,想講𤆬囡仔出來透一咧仔氣,若無囡仔嘛是足無聊。」民眾講,「遊客密度袂傷懸啦,我感覺攏誠好,而且每一个人攏真守規矩。」

陽明山國家管理處表示,7月17統計到五點,計共4025人入園。為著降低人流,陽明山遊園公車假日原本20分左右一幫,這陣維持一點鐘一幫,到7月26看疫情變化,才閣調整。

全台敬老金大調查

相關新聞