小解封頭日 新竹遊樂園千人遊覽.北埔舊街人無濟

三級警戒微解封的頭一个假日,新竹一間主題遊樂園區,一透早開門出現就有遊客買票入去𨑨迌。業者表示,今仔日遊園的人數有機會破一千人。毋過佇北埔老街這搭仔,暫時閣等無啥物人客。

遊樂園猶未開始營業,就有遊客等欲入去☒迌矣,微解封的頭一个假日,遊樂園出現觀光人潮,雖然講人數猶是比過去差真濟,毋過業者講看會出來,遊客已經有漸漸轉來矣。

遊樂園業者張家綸講,「真濟親子遊客來𨑨迌,嘛照相關的防疫規定順序入園,園區估計今仔日入園的人數有機會破一千人。」

來到北埔老街,遊客無講蓋濟,有來排擔仔的嘛是比過去減了真濟,猶毋過生意已經比疫情期間好誠濟。

北埔老街業者講,「感覺起來閣袂䆀,人潮有濟淡薄仔,(敢會真期待這改的微解封),袂講真期待,上好是攏解封,莫微解封。」北埔老街業者表示,「期待啊,毋過目前來看無啥物人潮到。(所以影響嘛是真大),影響誠大。」

雖然疫情已經沓沓仔轉和,真濟所在一寡設施嘛漸漸解封,業者猶是向望會使等到真正解封,予逐家的生活趕緊恢復正常。

全台敬老金大調查

相關新聞