青年就業獎勵金上濟發三萬 部份退伍煞領無

勞動部佇舊年推出青年就業金的措施,鼓勵就業,畢業了後若食頭路滿一定的時間,就通仔領著上濟三萬的津貼,毋過有民眾向立委陳情,彼陣卡佇愛做兵,煞無通領。就有立委今仔日開記者會,講替國家服務,無應該受著這款對待,要求勞動部共遮的人列入去補助範圍內。

舊年勞動部推動青年就業獎勵計畫,只要舊年初到彼陣9月底,做工課滿3個月至半冬的青少年,就通領著上濟3萬的補助,但有彼陣畢業就馬上愛做兵的青年陳情感覺權利予政府剝奪。

陳情民眾 (聲音來源)張先生講,「阮6月份畢業根本揣無頭路,因為其實阮欲做兵,較加就是講兼差,110年的計畫,結果阮也是予人排除在外,阮仝梯攏足無歡喜。」

舊年7月做兵10月退伍的張先生就無通領,雖然勞動部佇今年新推出的青年值得好評計畫,已經有共進前拄著做兵的青年考慮在內,但是立委猶原認為,除了揣無頭路的,也愛共這馬有工課的回算在內,才有公平。

立委趙天麟表示,「希望共109年畢業的役男,直接通列入110年青年就業獎勵計畫內底,青年值得好評計畫是毋是會當展延,佇110年6月30以後退伍的役男也會當申請。」

勞動部勞發署表示,假使舊年做兵了後,到今攏允無頭路的,in會透過計畫協助就業、領取津貼,毋過若已經揣有工課,考量佇其他部會有補助,欲全部補償較無可能,但是嘛會閣共內部討論遮的意見。 

相關新聞