高雄各宮廟驚普渡禁辦 弱勢領無物資歹生活

後個月就是中元,真濟大廟攏會辦普渡,而且有真濟民眾會共普渡了後的泡麵、罐頭,捐予社會福利機構。毋過受著疫情影響,今年真濟宮廟攏無欲辦普渡,廟方也講:若無辦,也無法度幫助弱勢,實在誠可惜。

來到五甲龍成宮媽祖廟,民眾猶是愛佇外口參拜,毋過因為微解封,希望通予信徒入來參拜,廟方已經向市府提出防疫計畫,嘛已經規劃路線,室內空間上濟60人,公所初步已經同意。

參拜民眾:「抑是佇外口,按呢較安全,源頭佇佗位猶毋知,無的確入去又閣,按呢真危險。」

其實目前高雄干焦有三間寺廟佮教會,提出申請欲開放,毋過進香、普度猶是攏袂當辦,後個月初八就是舊曆七月,旗山天后宮逐年普渡攏誠鬧熱,廟方煩惱,普渡若無辦,真濟弱勢家庭會真失望。

旗山天后宮資訊組長林延欣表示,「每一年差不多攏有超過五百桌普渡桌,有一寡是勾選欲自取,欲領轉去食平安的,另外差不多四百幾桌的供品,阮攏會捐予遮的弱勢族群,所以遮若是無辦,阮是感覺非常可惜。」

所以旗山天后宮今年按算欲辦線頂普渡,廟方鬥相共攢普渡品,信徒人毋免到場,線頂直播法會,就會當避免群聚。因為中元普渡是宗教活動,民政局表示,閣愛看疫情發展,隨時檢討敢欲放冗。

全台敬老金大調查

相關新聞