故宮南院重開 消毒限出入.無到百人預約參觀

故宮南院7/13恢復營運,除了有防疫措施,閣有人數管制,而且每3點鐘,就會清場消毒。開館的第一工,已經事先登記的遊客差不多有70人。若佮舊年七月時仔來比,人數是差幾落十倍。

故宮南院13恢復開館,第一工早時,來的民眾無講蓋濟,攏是對外縣市來的,民眾講會當出來,心情加較輕鬆,對一寡所在的防疫,嘛誠有信心。

參觀民眾李先生講,「我想逐家攏有做好防疫的措施,攏無啥物問題,應該是無要緊,無啥會煩惱。」另外,參觀民眾俞先生講,「我感覺對公共場所來講的話,就是猶是對in (防疫) 有信心。」

配合微解封,故宮南院除了防疫措施,閣限制入場的人數,而且需要接觸身軀的設備親像耳風、用手摸的螢幕,攏袂當使用,室內室外嘛袂當吃物件,毋過園區的餐廳表示,為著員工的生活,猶是愛來開店。

故宮南院餐廳業者表示,「大部份阮攏會提供符合防疫的餐點,目前來講看會當賣予館內的職員無,猶是佮外送平台來配合,來增加一寡收入。」

微解封這段時間,故宮南院參觀的時間,分做早時佮下晡,一場上濟100人。故宮南院表示,雖然兒童展廳佮教育推廣活動無法度來辦,但是館內已經有增加新主題的展覽,嘛請有興趣的民眾利用網路來預約。 

全台敬老金大調查

相關新聞