屏東.高雄圖書館 今起通線頂預約.現場領冊

雖然目前全國圖書館猶未解封,毋過7/13已經開放一个窗仔口借冊,親像屏東佮高雄,攏開放線頂借書的民眾來領冊,高雄圖書館特別佇戶外設一個借冊站,予民眾分流來借冊。

高雄市立圖書館總館一樓,成做戶外借冊站,中晝開始,接著電話通知的民眾,按時間陸續到位,已經欲兩個月無冊通看,等著微解封會當來借冊,民眾真歡喜,因為親像這位阿母,這段時間已經開真濟錢咧買冊予囡仔看。

民眾何小姐講,「這馬會當預約真好,若無干焦這兩個月,開真濟真濟錢咧買冊,因為伊平常時就會看冊。」另外,民眾蔡小姐講,「進前借的攏已經看了矣,想欲等新的冊來,囡仔也佮意看冊,就無冊通看。」

雖罔微解封,圖書館防疫措施是照步來,而且半點鐘才十个人會當來挈冊,估算平常日開放120人,歇睏日140人,民眾坐佇安排的位,有專人服務。

高雄市立圖書館代理館長林奕成表示,「每一位民眾坐家己的位,像長輩注疫苗坐佇現地,由館員服務共冊借好,囥佇桌頂家己來收。」

封館這兩個月,已經有一萬三千外人,線頂注文借兩萬七千本冊,圖書館會陸續通知。屏東縣立圖書館總館共民眾預約的冊,攏搬來大門口,民眾愛先線頂注文,接著通知以後就會當來挈冊,防疫踮厝內無聊,總算是等到有冊通看。

相關新聞

專題|全台敬老金大調查