7/13開放9人旅行團 餐廳禁現食降低綴團意願

中央政府宣佈7/13開始,會當小可解除封鎖。國內旅遊開放九人以下的團體。毋過高雄的旅遊業者表示,目前九人旅遊團,猶是無人報名,因為這馬閣是三級警戒,而且除了澎湖,其他縣市的餐廳,攏猶未開放內面用餐,旅行團無法度𤆬(tshua7)人客去食飯,限制真濟,民眾的意願攏無懸。

忍耐欲兩個月,中央宣佈旅遊微解封,旅行業者早就準備好矣,只是逐家敢真正敢出去耍?開放九人以下團體的消息出來,高雄業者表示目前猶無聽講有人出團。

旅行業者楊子盷講,「阮知影有人捒,毋過這兩工沒看著成團的。」

高雄市旅行公會理事長吳盈良表示,「這馬欲去共消費者招來,第一成本傷懸,第二,因為無熟似的人做伙出團,消費者內心感覺嘛是會驚。」

其實這馬網路頂已經出現三四人至六人的旅行團,只是13以後的團體真少,嘛真少人訂位,民眾組團意願無懸,公會理事長表示,上重要的是,因為這馬各地餐廳猶是袂當內底食,景點人數嘛袂當超過百分之四十,限制閣真濟,民眾若欲出來耍,猶是會佮厝內的人家己駛車去。

旅行業者楊子盷表示,「九人座的車逐家kheh做伙,九个人做伙,雖然政府後來開放矣,毋過業者為著欲做,會用大車,予逐家較放心,這个成本無形中嘛會較懸。」

歇熱本底是旅遊的大月,微解封出團煞誠困難,業者認為,猶是著等完全開放,篩檢試劑佮疫苗較普遍,旅遊團才有可能成團。

相關新聞

專題|全台敬老金大調查