為恢復上課準備 嘉義幼教人員拍拚注疫苗

嘉義今仔日開始共幼兒園和安親班的老師注疫苗,縣政府表示,大概9成的老師攏有來注;下一波換國中小和高中職的教職人員會使來注疫苗。

分流安排前來的教職人員,等待欲來注射,嘉義市有942位、嘉義縣有1252位幼兒園老師佮教職員工,攏佇今仔開始來注疫苗。

嘉義市陽光幼兒園長張碧紐講,「真濟家長 閣有真濟老師攏誠期待復課,阮今仔日注疫苗了後,阮會當產生免疫力以外,阮嘛希望幼兒園所有的囡仔攏有閣較好的保護。」

嘉義縣幼教老師林老師講,「阮幼教人員會面對真濟家長佮學生,所以如果有接種疫苗,家長佮學生,其實對家長來講的話In較會安心。」

政府宣布7月12微解封,為欲準備紲落來可能恢復上課的情況,嘉義縣市攏趕緊安排幼教人員來注射,嘉義縣為欲提升注射的速度,閣改良設備,來減輕醫護人員現場的工課。

現場醫護人員表示,「快打車直接捒到民眾頭前,閣來直接替in插健保卡,電腦讀資料,連鞭就會當替民眾來掛號。」

嘉義縣幼教老師陳老師講,「接觸的人誠濟,然後有注疫苗了後,嘛較有保險。」

嘉義縣市攏表示,幼教人員來注疫苗的人數有9成以上,紲落來國中小佮高中的教職人員,嘛已經開始統計人數佮造冊,希望會當佇9月開學前兩禮拜,完成學校環境的群體防護。

全台敬老金大調查

相關新聞