臺大醫護請留職停薪育囝 復職煞無疫苗通注

臺大病院有醫護人員育嬰留職停薪,歇了欲先來注疫苗,煞發見因為執業登記暫時取消,無符合第一類人員注射。病院工會就批評講,中央講欲予遮的醫護人員轉去上班進前注疫苗,地方政府無一定攏會照辦。

台大病院有醫護人員前一站仔請育嬰留職停薪假,這陣按算先注疫苗,欲轉去做工課矣,毋過煞因為留職停薪期間執業登記是暫時取消的,台北市衛生局講,按呢無法度注。

台大醫院企業工會顧問郭豐慈講,「台北市衛生局的回函是講,無算是第一類的疫苗人員。阮彼位同事上尾仔誠無簡單佇新北市揣著一間病院,願意幫伊注疫苗,只是注射彼个時間點到伊轉去做工課無到兩禮拜,就是阮按算疫苗會發生效果的上短時間。」

工會表示,雖罔中央是有欲予遮的醫護人員會使佇轉來做工課進前,先注著疫苗,但是地方政府的政策是無一定綴會著。

台大醫院企業工會顧問 郭豐慈表示,「中央的立場應該是按呢無毋著,但是可能中央佮地方的溝通有問題,抑是對法規實務的執行有一寡無了解,所以才有遮的代溝問題,也就是講逐家攏會感覺欲轉來當然會使來注,但是事實上欲轉來想欲注的人煞揣無管道會使來注。」

記者佇截稿進前,猶未得著台北市政府的回應。工會表示,目前提供予第一類醫事人員的疫苗是袂講蓋欠,希望主管機關著愛提供會當伸勼的疫苗政策。

全台敬老金大調查

相關新聞