受疫情衝擊 嘉義文創園區委外業者提早解約

嘉義文創園區對2016年開始,予外口的廠商來經營,原本簽15冬的廠商,煞受著疫情影響,營業5冬外了後,已經佮文化部提早解除合約。嘉義市政府表示,會協助園區內面欲到50間的商家,嘛呼籲文化部,愛成立專案辦公室,予園區內面的建築物,會當重新規劃再利用。

占地4公頃,全區有16棟建築的嘉義文創園區,因為疫情的關係,廠商結束5冬外的經營。內底將近50間的店頭為著保謢權益,嘛成立自救會。有業者講,相關單位應該要思考,莫予這個觀光的大門,磕袂著就重來。

園區業者講,「對嘉義地方一个公共財,我感覺是無尊重。身為主責單位的,親像文化部或者是阮地方政府,阮敢會當放任伊按呢,閣囥五冬、十冬。」

廠商佮文化部的合約到7月31,內底一寡藝文展覽的物件,嘛攏拆掉,佇園區推廣藝文的團體就講,這个園區是嘉義藝文發展一個誠重要的所在。

阮劇團副團長蔡明純表示,「嘉義市確實無這款小劇場創作空間,阮是誠希望講紲落來毋管是佗一个單位接手,猶是會當繼續佇遮來經營。」

嘉義市文化局表示,這个園區是台灣設計展的展場之一,展覽的規劃並無受著解約的影響,除了會協助店家來維護in的權益,嘛呼籲文化部會當來嘉義成立專案辦公室,共同配合重新規劃文創園區的使用佮發展。

全台敬老金大調查

相關新聞