外籍生畢業袂當做散工 今拄搪疫情僫揣頭路

嘉義一名馬來西亞的大學生，6月30大學畢業了後，因為不再有學生的身份，袂當閣佇台灣做散工，干焦會使揣正式的工課，但是目前台灣因為疫情等等的原因，工課誠僫揣，伊講目前有真濟畢業的僑生攏有這个問題，無知影欲按怎才好。

佇嘉義做散工的外籍大學生，畢業了後，照規定就袂使閣做散工。嘉義大學的這位外籍僑生，這馬就拄著無錢通轉去，留佇台灣嘛揣沒頭路的問題。學校表示，畢業的僑生會當依法申請居留延期，如果有需要會協助學生來辦理。

僑生顏潔穎講，「因為台灣這馬嘛是三級警戒，所以阮欲揣頭路嘛是誠困難，因為真濟所在攏無營業。」

伊是來自馬來西亞的僑生，四冬前來嘉義讀大學，因為欲做散工，逐學期攏愛向勞動部申請，這馬離開原本的工作，以前工課的店長就講這站仔工課真正僫揣。店長江宜靜講，「因為伊是外籍僑生，所以揣頭路這方面會誠辛苦。」

顏潔穎（Gân Tsiat-ínn)講目前in的國家，疫情嘛誠嚴重，欲轉去的交通、篩檢的費用，攏愛家己來出，想欲留佇台灣，這陣閣揣無工課，有誠濟畢業的僑生攏拄著這个問題，逐家攏毋知影欲按怎，干焦會當期待疫情趕緊轉和。