高雄百外間診所才配74罐疫苗 陳其邁:會閣協調

高雄市今仔日開放72到74歲的老大人,注莫德納疫苗,對昨昏下晡到今仔日,大型注射站攏真濟人,衛生局預測,高雄市這兩工,會當注4萬外人。基層診所雖然是今仔日開放注射,毋過128間診所,才分著74罐疫苗,診所認為按呢的數量傷少。

計程車佮轎車,陸續共老大人載來高雄展覽館,遮的老大人攏是75歲以上猶未注預防射的,聽著這擺是莫德納,來補注的老大人實在真濟,愛排隊才會當入去。

接種長輩講,「AZ我無愛注,死遐濟人我無愛。」家屬表示,「因為身體毋是真OK,較慢注,這馬拄好莫德納入來,就注莫德納。」

想袂到老大人補注意願遮爾懸,初一才半工,已經注1萬2千外筒,注射比率百分之九十九,初二開始三工,增加72到74歲的老大人,因為分流,注射站已經無遮濟人,高雄市這擺分配著7萬外支莫德納疫苗,其實基層診所初二嘛開放注預防射,毋過128間診所才分著74罐,有時愛兩間診所分配一罐,有診所真失望。

大高雄醫師公會理事長王宏育表示,「衛生所共阮講你若招有14个,我一定予你一罐,有的診所一工大概45个,這馬拜三才規定講一工上濟一罐,約45个,伊就昏倒矣。」

高雄市長陳其邁講,「市府會佮公會閣協調,假使診所量能會當增加,就直接到診所注射,民眾愛事先預約。」

市府表示,煩惱診所空間無夠大,所以目前以大型注射站為主,效率較好。王宏育認為,上大問題是疫苗傷少,希望中央有疫苗就較緊分落來地方,診所嘛會當鬥相共,協助市民注預防射。

全台敬老金大調查

相關新聞