全球經濟沓沓回穩 國內製造業外銷訂單增加

雖然變種病毒擾亂一寡國家,解除封鎖的時間,毋過全世界的經濟,看起來有咧恢復。雖然國內的服務觀光業,受著誠大的影響,毋過製造業的外銷訂單,煞是接袂離。就有專家表示,若準國際上會當共Delta變種病毒,控制予好勢,製造業的交貨期就袂拖,整體產業趨勢,也是會當樂觀看待。

台灣三級警戒個外月,餐飲、觀光、旅行運輸業等等內需市場,受誠大衝擊,不過佇製造業這部份無受誠大影響,根據台經院上新的公布,5月份整體製造業景氣信號值比4月減0.82分,來到17.71分,落小可仔來到代表景氣有起來的黃紅燈。

中華經濟研究院第三研究所助研究員陳馨蕙表示,「目前阮看著電子和工具機部份,猶是佇交期閣搝長,煩惱疫情和國際封鎖,其他原物料的部份受著金融市場因素,或者是進前價數起傷濟,有一寡回檔呈現觀望。」

專家表示國內雖罔出現電子廠集體相穢,廠區分流加強防疫,無造成大規模停工,對出口和生產影響有限,抑若以外銷為導向的紡織業,頂半年因為原物料欠貨也起價,交貨狀況較艱難,不過業者表示第三季和第四季攏真樂觀。

紡織業拓展會秘書長黃偉基講,「舊年10月份訂單就開始回攏,紲落來歐周和美國市場攏漸漸復甦解封,所以訂單只會變濟,所以今年第三季看起來會比第二季閣較好。」

中華經濟研究院院長張傳章表示,「不過資訊佮通訊產業、運輸倉儲業和批發業,商業活動訂單以及未來六個月展望,雖然佇五月份攏大落轉做縮絚,六月份就隨起十个百分點,轉做擴張。」

這陣變種病毒猶佇各國咧湠,加上美中關係發展無確定因素,可能影響製造業表現,後半年疫情敢有法度有效控制,猶需要持續關注。

九合一選戰解析

相關新聞