外送人員目前算佇第7類的注疫苗對象。對6/30下晡開始，北部地區的外送員有人收著注疫苗的通知，毋過煞也有台南地區的外送員收著，就有人懷疑講:這名單有問題。
提出6月30收著的訊息，通知會使來注疫苗矣。公路總局講，目前疫苗是先分配予雙北市、基隆、桃園的外送員。猶毋過全國外送產業工會講，佇外送員的群組內底，有傳出南部的Uber Eats外送員嘛收著訊息，逐家咧質疑疫苗造冊是毋是有問題。
全國外送產業工會發言人蘇柏豪表示，「我有聽講有一寡台南的外送員，嘛有收著注疫苗的通知，但是我嘛毋知講，這是真的抑是假的。」
公路總局運輸組綜合運輸科科長連思源說，「伊(平台)是講有可能是，進前佇北北基桃外送，落尾伊轉去中南部。」
針對名單可能有錯誤的部份，記者佇發稿進前，是猶未得著Uber Eats的回應。蘇柏豪講，雖罔逐家攏誠歡喜會使來注著疫苗，毋過目前猶是有北部的外送員猶未收著會使注疫苗的訊息。
全國外送產業工會發言人蘇柏豪說，「Uber Eats目前是較濟收著啦，Foodpanda可能等較尾仔，這幾工閣再看覓仔，目前攏猶未收著，對公布到這馬攏無佮外送員講到底是按怎做名冊，有啥物標準會使寫入去名冊內底，這中間攏無佮阮參詳過，我感覺講這是較無理想。」
公路總局運輸組綜合運輸科科長連思源說，「阮大概就是會看疫苗的數量來做排序，沓沓來做安排，伊(平台)予我一寡優先名單，疫苗數量看平台業者，落去分配相關的比例。」
Foodpanda講，in名單是真早就送予交通部，內底有開始做外送工課的時間等等資料，詳細會使注疫苗的名單佮時間，攏是由交通部佮CDC來決定的。
